萬眾期待的英超聯終於開鑼，唔駛再過寂寞的星期六喇，哈哈哈！

今季英超的第一場比賽係曼聯作客對愛華頓，開早場，香港時間七點九開波。睇曼聯喎，打打氣先，曼聯必勝！

上半場曼聯有驚無險，雲佬臨完半場接應奧沙轉中領先一比零。

下半場一開波，R8憑住對手的出錯輕鬆送個波入網，贏到兩球，呢個比數亦都保持到完場。

以季初來講，曼聯的狀態都唔錯，進攻都做得ok，不過後防就有點嚇人，以里奧同施維斯達的身高居然頂輸俾愛華頓的矮仔卡希爾，攪到個禁區風聲鶴唳，好彩我地新加盟的門將雲達沙有出色表現先可以力保不失咋！

呢場係菲臘仔離開效力十幾年的曼聯後第一次的倒戈相向，睇到菲臘仔身穿拖肥糖的藍色球衣個感覺的確係怪怪地。

記得剛剛支持曼聯的時候，菲臘仔先剛剛上到一隊，睇佢踢曼聯都睇了十個年頭，如今為了入選國家隊的機會而離開實在令人覺得好感慨。當年的曼聯七小褔，如今只係得番傑斯、史高斯同加利仔咋。