期待已久的颱風終於出現喇，哈哈哈！

在下午8 時，熱帶風暴珊瑚集結在香港之東南偏東約570公里，即在北緯20.2度，東經119.2度附近，預料向西北移動，時速約25公里，靠近廣東省東部。
（以上天氣稿由天文台於2005年08月12日19時45分發出）

係咪覺得有點變態呢，居然為颱風來臨而慶祝，須知道颱風會為人們的生命財產帶來威脅，打風唔係甚麼開心的事！呢個道理我當然明，只係因為今年到八月都仲未打過風，等等下忽然變得有點期待，我都知我渴望颱風來臨的想法係唔妥咖啦！=p

唔知係咪地區性的問題，話就話打風，今日都無乜雨喎，除了剛才落過一兩分鐘大雨之外，都唔覺天文台所講的狂風雷暴！不過天色就真係好差，四周圍都好似好大霧（我諗應該係煙霞之類），能見度好低，而且仲好焗添呀！最好的活動都係留係屋企睇”我的野蠻奶奶”大結局。=)

今日係一年一度會考放榜的日子，全日的新聞都圍繞著有關的消息，令到本來無關痛癢的我亦注意起來，還想到了自己的會考放榜。

時間真係過得好快，屈指一算，我的會考放榜已經係八年前的事，記憶已經好模糊，連當日的心情都唔係好記得，我想應該係有d緊張掛。果陣係九七年的暑假，金融風暴之前，經濟環境好，讀書唔係唯一的出路，所以緊張極都唔及時下的人，而我就更加係傻更更的一群，毫無準備下，兩手空空咁番學校攞成績，幸好勉強在原校升讀了中六。

由於當日全部同學都在禮堂取成績單，對於各人的成績，只要看看大家的臉容都可略知一二。最深印象的莫過於同學們抱頭痛哭，有同學更加未攞成績已經緊張到喊！而我的一班在一致睇淡的情況下，就只有十一、二人能和我再續前緣。

我的學生時代，多得幸運之神的眷顧，未有遇上徬徨的一刻，未曾為一席學位而頻撲，符符碌碌地走過了。但走過之後才醒覺自己一直未有珍惜機會，每次過關都同自己講：”第日要努力。”結果又係故態復萌，一次又一次，機會就白白流出lu！

今日去文具店本來係打算買本2005年的organizer咖，點知入到先發現原來已經無得賣lu，貨架上全部都係2006年的organizer喇。有無攪錯呀，現在只係八月咋喎，咁快就出06年版，心有不忿之下決定問下個店員仲有無05年的殘餘物資，點知真係無！sigh~

離開文具店之後依然有點唔甘心，所以走去另一家精品店到搵，結果眼前都只見06年schedule，唉！但都仲係死心不息，又走去問個售貨員仲有無05的存貨，再次得到”無”呢個答案。正當要無奈接受事實，打算退而求其次買萬年organzier（日子要自己填果隻！），個售貨員就向我推介一個2006 schedule book，佢話呢本organizer有包括05年last幾個月咖，佢仲打開個包裝俾我睇添呀！E，真係由05年8月開始咖喎，而且只賣27蚊咋，好！就要呢本啦！

呢個售貨員真係抵讚，既幫客人搵到想要的貨品，又幫舖頭做多一訂生意。啪啪啪，掌聲鼓勵！

下晝時發覺個pocket pc痴o左線，居然自己開機，攪到無哂電！最無奈的係部機一無哂電，裡面d資料就會無哂，OH! NO!好彩裡面d文件多數都有備份係屋企部腦到，不過其他資料就係咁先！唉，又要搵番哂本來記係裡面d電話號碼、戶口號碼同密碼，真係混帳！我睇都係用番傳統organizer比較好呀，聽日就去買本先得，2005年都過o左一大半，organizer應該好平喇掛！