下午行街時發現四圍都在熱賣開學用品，一向喜歡文具的我也去湊熱鬧。可能因為人長大了，不像以往般浪費，即使已離開了校園好一段日子，當年用的筆袋、筆、活頁簿等都仍然留著，一時之間真係唔知有乜好買，最後買了一本日記簿。

對我而言，日記簿是一樣好有意思的物件。回想第一次寫日記，應該係中一暑假的事，己經忘記了寫日記的原因，可能係貪新鮮啦。當時日記的內容不外乎係幾點起身呀、早午晚三餐食乜呀等等平平無奇的事，久而久之當然會覺得無聊喇，日記很快就成了週記月記，最後被遺忘了。

直至三年後，一個偶而的機會，我將本來係用來俾同學寫紀念冊的米奇日記簿改成為一本真正的日記簿，從此之後寫日記就成為我生活的一部份。

小時候以為日記真係要日日寫，記低每日發生的事，後來先明白日記原來唔駛日日寫咖，寫日記亦唔一定係記下生活鎖事，有時可以用來寫下內心感受，有感而發之時不妨打開日記簿，以文字抒發情感，遇著生活平淡、無事可記的日子就唔駛勉強留字。

或者因為我係個多愁善感之人，我的日記簿裡面記的煩惱的事比快樂的多，寫得越密，心事就越多。記得高峰時期係９８年聖誕到９９年暑假，一口氣寫完剩下的半本日記簿。話就話係心事最多的日子，但現在回看此段回憶卻係令人會心微笑。

可惜用完呢本日記簿之後，我的日記之旅就開始停滯不前，第二本日記簿用到現在都未用完，一用就六年，可想而知我有幾懶，除了因為Blog的出現令我少了用日記簿外，最大的原因莫過於係”生活平淡、無事可記”。無錯，無事可記可以話係無事可煩，但係筆者卻覺得無事可記只係代表生活平淡得可怕，煩的事卻依然係一大堆。Sigh~

希望新的日記簿可以記載一些精彩的生活吧！